tschapatalpas_adm

About tschapatalpas_adm

https://tschapatalpas.gr

Posts by :

229888506_10227194624150109_1571426545174003729_n

Schnogg n Roll vol. 58

Dä Samstig isches endlich wieder sowit gsi und dr ersti Guggatreff isch vor dr Tür gstanda. Ds Schminkteam het wiederamol z’besta geh & jeda het farb im Gsicht kha. Uf dia 16:45 Uhr hets den gheissa abfahra richtig Tägerwilen (TG). Im schöna Thurgau akho, hemer alles usem Car usglada & üsi Sacha im Instrumentadepot versorgt. Dia ersta Guggena hend schu gspielt & uf üsa ersti Uftritt uf dr ussa Bühni hemr au nid lang müassa warta. Am 19:30 hemr denn endlich ufd Warm Up Bühni dörfa & hend 4 Liader zu üsem besta geh. Nochem Uftritt simer den amol dia Halla go beguatachta & hend d‘Deko ganz genau unter d‘Lupa gnoh. Bis zu üsem Uftritt hemer da Guggena zuaglosa, zur Musik tanzt & eis viellicht au zwei trunka. Den isches au schu bald 22:45 Uhr gsi & miar sind dra gsi mit Huupa. Üsa ersti grossi uswertigi Uftritt hemer erfolgrich über d‘Bühni brocht & d‘Lüt hend Freud kha & super mitgmacht. Nochher hets den natürlich gheissa Festa, Festa & nomol Festa & dia einta odr andera hend eis über da Durst trunka. Wo den alli Guggena gspielt kah hend, hemer den no abiz ds Tanzbei gschwunga dia einta sogar mit ma stacheliga Tanzpartner in Form vumena Kaktus (Namen der Redaktion bekannt). Wia immer wenns uf dr Uhr 02:00 ahzeigt, machend miar üs uf da Heiweg in da schönst Kanton.

Danka viel mool da Gottlieber Schnoogge für das lässiga Fest.

by Livia

20210817_080821172_iOS

Sgarella Auftakt

Am 11.11 ischs wia alli Johr, d Saison fangt ah!! Trotz regnerischem Herbstwetter hend sich doch zahlrich Lüüt ufem Sentupada Platz versammlet. Ab da 18:00 hend miar üs versammlet und 11 Minuta spöter isches denn au schu los ganga mit em Monsterkonzert mit allna beteiligta Guggena. Noch dem Uftritt hemmer üs in da Mengi verteilt. Dia einta hend sich an de Bar verwiilet und anderi gspannt da anderna Gugga zuagloost. Am 20:53 Uhr hemmer üs den au parat gmacht zum s ersta mol dia Saison a Bühni zum rocka z bringa. Mit 2 neua Lieder und vielna altbekannta Stück hemmer dia Mengi definitiv könna mitriisa. As isch a geniala Saisonstart gsi!!  Noch em Uftritt hemmer no da anderna Guggena zuagloosa. Harti Krieger sind natürlich no de Obig in da Emser Beiza go usklinga loh. Somit het üsi Saison definitiv ahgfanga.

by Simon

51295893_10218805131018024_3482526325896380416_n

Guggenwahn, Zunzgen

Dassmol isches uf Zunzga ganga zu da Büchelgrübler ans Fest Guggewahn.
Do miar dassmol eher an wita Afahrtsweg kha hend, hemer üs bereits um 14:30 Uhr troffa und hend Farb ins Gsicht kriagt.
Da Car isch den am 4i z’Ems losgfahra und mit Saus und Braus hemer üs uf da Weg uf Zunzga gmacht. Wia immer hemer z’Fuchsberg an kurza Stopp bim Mc Donalds gmacht. So hend dia einta no öpis z’schnabuliera kha, anderi hend sich liaber am Bier gwidmet.
Ca. am 7ni simer den ako, mitera kurza Verfahrig in Zunzga selber. Miar hend nur an Car vor us gseh und gmeint miar sind richtig. Jedoch hemer den zum Glück no knuag früah gmerkt, dass dia im Car vor üs alli Skisacha ahend und grad gär nit noch Gugga usgsehnt. So hemer üs den zum richtiga Ort begä, womer den au d’Itrittsbändeli kriagt hend.
Miar hend üsi Instrument könna aswo bim Festgländ deponiera und während am döt hera laufa, het eina vo da Büchelgrübler no gmeint kha, bitte kai Konfettikanona uf da Bühni. Okeeeee machemer nit… dafür hemer überall sust mit üsna Konfettipistola üsi Freud kha.

Vom Verastalter hets den an feina Znacht gä… zwor wieder Hörnli mit Khackets… aber as isch würklich meeega fein gsi. Do da Znacht akli Verspötig kha het, isch üs allna no as Bier offeriert worda… für d’Fraua hets sogar Eve gä! Danka tussig.

Z’Fest het zwei Hallana und as grössers Kaffezelt kha. Döta hettma sich guat könna verteila. Jedoch hets jensti Lüüt kha, dos halt scho ab 16ni gsi isch.
Isch den leider mit da Ziit fast zu volla gsi. Im Zelt het ganz a lässigi Blosinstrumentaband us ca. 6 Lüt gspielt. Dia hend recht Stimmig gmacht.
In da einta Halla isch mehrheitlich Bravo Hits Musik glofa und in da andera Halla sind den d Gugga-Uftritt gsi.
Miar hend den am 11:30 Uhr üsera Uftritt kha. Het Spass gmacht.

Jetzt gots den mit üserem Fest los…

Danka da Büchelgrübler für das tolla Fest.26.01.2019, Corina

Suugerguuggete Rüsssuuger, Emmenbrücke

D Rüsssuuger hend üs zu ihrem Jubiläum iglada. Do hemmer natürlich nit nai gsait.
Einigi fu üs hend sich schu am Morga früah uf da Weg gmacht und sind an d Bahnhofguggete in Luzern ganga. 
Da Resta isch den mitam Car nocha greist. Kum akoh hets den schu ghaissa – schminka. Miar hend üs neba dr Bühni as Plätzli igrichtet. Doch demol isch ds Schminka nit so aifach gsi. Erstens sind d Liachtverhältnis nit grad optimal gsi und den het auno üsa Kompressor fu da Airbrusch-Pistola agfanga spucka. Dank üserna technisch versiarta Jungs hemmers den doch no gschafft, das alli farb im Gsicht kah hend.

Bald isch den au schu dia ersti Gugga uftretta. Wow, dia Gugga wo do uftreta sind, hend alli mega vieli Mitglieder. Do hemmer den schu abits Respekt kriagt.
D Guggana sind immer abwechsligswis im Zelt und in dr Halla uftreta. Wenn in dr Halla grad kei Gugga gspielt het, het an DJ sis Glück versuacht. Aber jo, also miar Tschapis hend müassa sega, das mit da Übergäng zwüscha da Liader hettemer jetzt auno besser hera kriagt als dr DJ. Und zudem isches schad gsi, daser kei Songwünsch agnoh het. Aber d Stimmig isch wega dem nit schlecht gsi, im Gegateil, d Lüt sind a dem Obig aifach super druf gsi.
Miar hend üs schu uf dr Uftritt gfreut und hend den wella geganüber da grossa Guggana nit untergoh. Drum hemmer den meh alls alles geh uf dr Bühni. Und as isch aifach nu dr HAMMER gsi! Ds Publikum isch abganga und miar hend üs fu üsera besta Siita zeigt. Miar hend den nocham Uftritt au viel Kompliment kriagt. Das freut üs natrülich bsundrigs.
Nochama schöna Fest simmer den wieder mitam Car hai gfahra.

Danka liabi Rüsssuuger für de unvergesslichi Guggaball.

19.01.2019, Rahel

Probeweekend und Jubiläum Seifesüder / Puure Guggesound, Leibstadt

Am 12.01.2019 hemmer üs am morga früah schu troffa zum üsas Probeweekend in Leibstadt ds starta. Noch üsera individuella Afahrt simmer in dia gschmückt Halla fu da Seifesüder und hend üs parat gmacht zum proba. Nochera witera Probeeinheit nocham Mittag hemmer den üsi Unterkunft für d Nacht könna bezücha. As isch super gsi, den d Unterkunft isch grad unter dr Halla gsi. Nochdem alli ihres Bett gfunda hend, hemmer den au schu mit Schminka gstartet

Jo und den isches los ganga mitem Puure Guggesound. Miar hend den a kurza Uftritt am Apérokonzert kah und nocher hemmer a bits müassa warta. Dr Hauptuftritt isch erst am 01.20 in dr Halla gsi. Miar hend üs den dia Ziit mit Guggasound losa und am einta oder andera Drink vertrieba. Schlussendlich isches den aso wit gsi und miar hend üsa Uftritt kah. Ds Publikum het richtig mitgmacht und ds Spiela vor dera tobenda Mengi het so richtig Spass gmacht.
Noch und noch sind den alli ind Unterkunft zruck und völlig kaputt ins Bett keit.
Am nögschta Morga isch den no Ufruma und Zemmapacka uf dr To-Do-Lista gstanda. Aschlüssend hemmer üs wieder uf dr Heiweg gmacht. De het sich bits schwierig gstaltet, denn fum Samstig uf da Sunntig hets richtig viel Schnee geh. Aber miar sind alli guat und mit schöna Erinneriga wieder zruck koh.

An dera Stell nomol as grosses Dankeschön an d Seifasüder, dass miar hend dörfa in dr gschmückta Halla proba und an super Guggaball erleba. 

12.01.2019, Rahel

Chacheliball, Erlinsbach (AG)

Am Samstig Obig isches wider mol so wit.
Dr Chacheliball in Erlinsbach stot vor dr Türa und wia immer sind Tschappis voll dabi und sorgend für a hammer Stimmig.
Am Guggaball selber het neb da verschiedena Guggana au no a Lifeband dafür gsorgt, dass nia langwilig worda isch.
Am 22:10 Uhr isches denn endlich sowit gsi, d Tschappis hend ira uftritt und völlig selbsterklärend hemmer wider alles geh.
Noch üsem Uftritt hemmer no de andera Gugga und dr Lifeband zuaglost und am 02:00 Uhr isches denn au schu wider zit gsi zum tschau sega und miar hend alli im Car platz gno.
Im grossa und ganza ischsch widermol an glungana Guggaball gsi und miar hoffend natürli dasses allna andera au spass gmacht het mit üs.

A grosses Dankeschön and Erzbachgugga dasmer hend döfa ko und miar hoffend uf a baldigs widergse, het mega spass gmacht mit eu.
 
01.12.2018, Timo

Chnüblete, Gossau ZH

Dä Samstig isches für dia Saison zum ersta Mol wieder aso wit gsi und z‘Schminkteam het üs mit Farb vollgsprützt. Fliessig, fliessig sinds gsi, darum hemer üs noch ca. 1.5 Stund törfa in Car begäh. Während dera 2 stündiga Carfahrt noch Gossau (ZH) hets no a klises duranand gä mit da Uftrittsziit. Miar sind eigentlich uf dia 00:00 Uhr plant gsi, jedoch hents üseri Ziit mit da Schamaroper Poper ihrer Uftrittsziit verwechslet. Voller Vorfreud simer gsi (im Car hets gjubelt, dass hettender sölla khöra), dos plötzlich gheissa het dassmer am 22:10 spieled. Somit hettemer akli meh Ziit kha zum eis, zwei über da Turst z‘trinka. Schlussendlich hemer den glich 00:00 Uhr als Spielziit kriagt, do miar wia au d Schamis üs eigentlich aso igstellt hend zum den z‘spiela.

Jo genau iahr hend richtig khört. D Schamaroper Poper sind au am Fest gsi. Het Spass gmacht au mit ihna da Obig z‘verbringa.

Miar hend allna Gugga zuagloset und bald isches den au scho aso wit gsi und üsa Uftritt isch an da Reiha gsi. Üsa ersti uswertigi Uftritt hemer erfolgrich gmeistert und am einta oder da andera, hemer as Lächla ins Gsicht zauberet.

Danka viel Mol da Füdlichnübler für das coola Fest!

Churer Fasnacht

Letscht Nacht hemer a kurzi Nacht kha, do miar am 10ni bereits wieder hend müassa parat si zum schminka. Am 13:00 Uhr hemer den in Chur bim Kornquader abgmacht zum no Gruppafötali zmacha. Dank da Alexandra Coray (fotografias trun) hemer den super Fötali herabrocht.
Uf dia 2 het den da Umzug agfanga. Z Arosabähnli het den zwor scho a Strich durch d Rechnig gmacht, und durfab isch da ganzi Umzug leider nur extrem stockend vorah ganga. Während am Umzug hemer a super Kontermarsch gmacht, das het d Stimmig bi üs den in da Gugga au akli meh akheizt.
Wo da Umzug dura gsi isch, hemer den ufem Kornplatz da verschiedena Gugga zuagloset, und ganz am Schluss hend den miar au no d Bühni grockt. Drufab simer im Kontermarsch zum Rätushof abaglofa und hend döta an feina Znacht törfa essa. Mitemana klina Ständli für d Mitarbeiter döta, hemer üs den no bedankt und sind den los go gässla. Uf dia 09:00 Uhr hemer üs mit da Schamaroper Poper bim Kornplatz troffa. Döta hend miar zerst gspielt, den sind sie uf d Bühni ko und den hemer no zwei Liader zäma gspielt. Drufab simer ab da Bühni und witer go gässla. Miar hend üs den nomol mit da Schamis troffa und zwor am 00:00 Uhr bim Martinsplatz. Am Afang simer eifach beidi uf anera andera Siita gstanda, darum hend miar üs den mitemana Rhythmusstückli nomol durch d Menschamengi durakämpft, bismer den bi ihna gsi sind.
Miar hend üs nebananand ufgstellt und hend den battlemässig da Martinsplatz mit da Schamis grockt.
Danka vielmol da Schamis für dä super Abschluss in Chur.

Radio Pilatus Confetti Party

Am Fritigobig hemer törfa uf Luzern an Radio Pilatus Confetti Fasnachtsparty go. Ca. am 18:00 Uhr hemer üs bim Restaurant Schlosshügel troffa und üs den au grad in da Car begä. Kurz drufab simmer den losgfahra. Üsa Halt bim Mc Donalds in Fuchsberg hemer natürlich nit törfa uslo. Nochera längera Pausa als dassmer eigentlich plant hend (dos im Mc Donals so pumpavolla gsi isch) simmer den mitemana Car, wo gschmöckt het als wärer a Mc Donalds-Buda, witergfahra. Ca. am 21:00 Uhr simer den im Casino in Luzern ako. Döta hemer grad d Schteichocher us Chrienz atroffa. Nochem Instrument ablada simer den in dä Club nebam Casino ganga. Het würklich super usgseh döt dina. Drei Guggana hend den gspielt kha, inklusive üs. Am 00:00 Uhr hemer den üsa Uftritt kha. Do miar recht kaputt gsi sind vor Emser Fasnacht und as paar au am kränkla gsi sind, hemer üs den noch üsem Uftritt uf d Heifahrt gmacht.
So a ruhigi Heifahrt hemer glaub au no nia kha.

Gievgia Grassa

Am 05:50 Uhr isch Treffpunkt gsi bim Velounterstand bir Sentupada. Döta simer scho vo gaanz viel Oberstufaschüaler begrüasst worda. Punkt uf da Glockaschlag vor Kircha am 06:00 Uhr simer den mit Ach und Krach durch d Gassa vo Ems glofa und hend d Emser gweckt. Dia einta Bewohner gseht ma den amigs au durch z Fenster duraspianzla. Uf dia halbi 7 ni am Morga hemer üs den zum Schualhuusplatz Tircal begä, womer den fürs „Radio Televisiun Romontsch“ und natürlich au für all dia wo döta umagstanda sind, eis, zwei, drei Liader gspielt hend. Den isches grad wieder witer ganga. Miar sind vo da Familia Hilber iglada worda für an Apero bi ihna hina in „Via Quadras“. Döta hemer den au nomol eis, zwei Liader gpielt und hend üs den mit heissa Getränk, wennma wella het mit Schuss, ufgwärmt. Ca. am halbi 8ti simer den witerglofa und hend den bim Bahnhofübergang unadina nomol eis gspielt. Langsam het den üsa Maga knurrt, darum hemer üs ins Term Bel zum Zmorgaessa begä. Danka am Term Bel für dä feini Zmorga. Während am zmörgala hemer den am Livestream vo da Moorschlümpf no akli zuagluaget, wos uf Wunsch vo üs, den au einigi Tricks zeigt hend!

Uf dia 9 ni simer den ins Schualhuus Tircal go spiela, drufab ins Schualhuus Caguils und nochher den no als Abschluss in Coop.
Direkt nochem Coop hets gheissa, ab go schminka.
Dä Stress… *haha* Nanai, macht jo Spass mit dena trümliga Tschapis uf d Gassa z go.
Sobald alli gschminkt gsi sind, hend sich dia einta no verpflegt und den isches scho ab an da Umzug ganga. Da Umzug isch super gsi. Het Spass gmacht. Drufab hemer den no an kurza Uftritt wieder uf da Bühni bim Schualhuus Tircal kha und den hemer üs den no akli öpis z Trinka gönt, seis im Zelt oder bi da Muntagnards in da Alphütta.

Am 18:00 Uhr hend sich den alli Tschapis wieder am glicha Ort troffa und zwor im Restaurant Sterna. Döta hets den an feina Znacht gä und ma het wieder akli Kräft für da Obig könna sammla.

Am 20:15 Uhr hemer den üsa Uftritt bir Oberstufa-Fasnachtsparty kha, nochher simer den wieder go gässla und in da verschiedena Restaurants go spiela. Bi da Muntagnards hemer den au no an Halt gmacht und hend ihna üsi spontan igstudierti Kontermarsch vorgfüahrt. Natürlich hemer den bi ihna au no an Uftritt heragleit. Als allerletschti Uftritt hemer törfa vorem Restaurant Term Bel spiela. Het meeega Spass gmacht. Verruckt isch zwor gsi, dass während üsem Uftritt an Taxifahrer Zmitzt durch üs durafahra het wella. Das hemer üs natürlich nit gfalla lo. So öpis got au gar nit! Frechheit so öpis. Aber das hend nit nur miar aso gseh, all üsi Zuaschauer rund um üs uma, hend das au nit könna verstoh und somit hemer a riesigi Menschamengi kha wo da Taxisfahrer nit duraloh het. Natürlich hets da Taxifahrer ger nita igseh und het mit immer wieder Gas gä und as bizeli fahra d Lüüt uf d Ziiita dränga wella. Mit dera Menschensmeute hemer den da Taxifahrer gstossa… dia einta hend den d Tüüra göffnet, anderi hend Biar über d Frontschiiba gläärt und nomol anderi hend droht an z Taxi anazbrünzla… *haha* das nenntma amol Hilfsbereitschaft! Danka allna dena wo sich für üs igsetzt hend. Da Taxifahrer hets nochher den igseh und isch retour gfahra.
Da Obig het den trotzdem no spassig geendet, dass natürlich au nur well iahr hammer Lüüt üs so bejublet hend. So machts riesig Spass üses Besta zgä.
Dia einta vo üs sind den natürlich no kräftig go witerfesta.
A hammergeili Emser Fasnacht gsi!!

Load More