SPC Guggaball

Dä Samstig isch akli länger ganga. Miar hend am 12:30 Uhr mit da Schamaroper-Poper bir Stadthalla Chur abgmacht zum nomol zäma a kurzi Prob z’macha, wellmer am Obig denn au plant hend, mitanand ufztreta.

Nochera kurza Prob, hemer üs denn in an Nebaruum begä und hend döta üserna Gsichter Farb gä.

Am 15:10 Uhr isches den vor Stadthalla Richtig Manor ganga. Ufem Weg hemer denn natürlich no as paar Liader gspielt. Am Afang hettma scho fast denkt, miar sägend igrostet, do’s döt und döt amol akli falsch tönt het.

Womer den aber uf da Bühni bim Warm Up gspielt het, hemer wieder zeigt, dassmers jo glich aswia könnt.

Miar hend allna Guggana no ufmerksam zuagloset und den sind vorzua as paar mitem Bus vo Chur (Extrafahrt zur Stadthalla) gfahra. Döt ako hets an feina Znacht gä. Nochem Znacht hend d Schamaroper-Poper no as klises Spieli gmacht, damit dia langwirigi Ziit bis z’Fest agfanga het, schneller umagot. Leider hemer dia drei Meter Biar, wos für da Sieger gä het, nit könna in Beschlag nä. Da Luca hetti zwor gära amol aso a riesiga 3 Meter Becher mit Biar kha. (Schwerz, as het natürlich nit aso an grossa Becher voll Biar gä, wär aber schono cool gsi) Stattdessa hets drei Mol an Meter Biar gä!

Am 22:00 Uhr hemer üs parat gmacht für üsa Uftritt. Het wieder riesig Spass gmacht, vorallem halt vor da iheimischa Lüüt törfa Vollgas gä. A dazua kunnt no dassmer a Premiera kha hend und zwor hemmer a Fahna mitemana Fähnrich uf da Bühni kha. Miar hend als Verarschig immer amana Kolleg gseit, dassmer im a Fahna bsorgent dasser au amol mit üs zäma uf da Bühni isch. Er hets natürlich nit glaubt… aber aber, do hetter nit mit üserer Ehrlichkeit grechnet. Danka diar Daniel Iten fürs Fahna schwinga… egal ob dini eigeni oder üseri Vereinsfahna *grins*!

Noch üsem Uftritt hemer d’Instrument grad neba da Bühni aswo heratua, wellmer noch üsem Uftritt den grad no uf d’Bühni zu da Schamis hend törfa go mitspiela. Scho mega gsi mit so viel Lüt uf da Bühni stoh z‘törfa… Bi so Sacha kama definitiv säga: Musik verbindet!!

Aschlüssend hets den natürlich gheissa Paaaarteeey.

Super Fest gsi! Danka da Schamaroper-Poper!